首頁 icon-arrow 最新消息
返回

疫情嚴峻 樓市冷卻 代理及業主各出奇招吸客

武漢肺炎疫症蔓延,樓市觀望氣氛濃厚,二手更陷冰封。業主為求盡快出貨,除了減價,更要奇招百出,加佣送禮之餘,更有車位業主連車放售;亦有代理為求買家安心睇樓,會送贈「清潔服務」,又會拍片影相予買家參考。

市況不景,減價盤隨處可見,近日社交媒體就流傳一偵黃埔花園放盤廣告,寫上「肺炎確診價」$600萬出售,以吸引眼球。事實上,近日多區已陸續湧現劈價或低水成交。世紀21日昇地產執行董事黃文龍表示,新近錄得天后維景花園A座中層7室成交,單位實用449呎,原業主於12月中開價$830萬放盤,後見武肺肆虐,最終劈價近「一球」或11.7%,於近日以$733萬沽出,呎價$16,325。原業主沽貨後套現觀望,未打算再入市。

上述維景花園成交單位於滙豐及中銀網上估價分別為$839萬及$815萬,即是次成交低市價一成以上。參考同屋苑過往成交,一個與是次成交同座但低一層的同室單位,於2018年7月中造價已達$850萬,呎價$18,931,反映同類單位樓價已插水超過一成,並重回2018年以前水平。

黃文龍續指,近期市場觀望氣氛濃厚,北角11大屋苑於2月截至12日僅合共錄得2宗成交,較上月同期銳減五成。目前業主普遍已主動下調叫價5%,買家則一般還價一成。他續指,以往一般買家會一次過睇7至8個單位,惟現時不少買家已主動要求減少睇樓,例如有買家會要求最多睇3個最平單位,以免長時間外出。

不想減價「做爛市」 業主寧加佣兼送名錶

面對疫情,為求買家可安心睇樓,黃文龍指如業主有交低鎖匙,該行代理會在睇樓前先上門清潔,以酒精抹乾淨門柄及窗柄,增加買家信心。如遇上業主不肯開門,他就惟有帶客睇樓上樓下同類鎖匙盤,亦會在單位拍片影相予買家參考。

除了代理落力出招吸客,業主亦各出奇招放盤。黃文龍透露,一個450呎的海天晉中層單位,業主開價$1,000萬放盤,一星期後已減價$20萬,但業主不想一直減價「做爛市」,故同時由原本1%佣金加至現時2%佣,以鼓勵代理積極搵客。北角兆華大廈亦有一個271呎高層單位,開價$570萬放盤三星期後,業主表示如代理可做到$555萬或以上,便可獲得雙倍佣金,即2%佣。

黃文龍指,市場信心不足,心急業主發現一味減價作用不大,尤其豪宅貨已滯銷頗長時間,業主加佣急走已漸成趨勢,最近就多近一成放盤業主已經加佣,亦有業主「送勞」賣樓。例如珊瑚閣一個1,173呎單位,開價$3,000萬放盤近一個月,業主一直企硬不願減價,不過就表示,如代理達成交易,即可得1%佣再加價值$10萬的勞力士名錶。

代理先拍360推廣 睇樓獲贈「清潔服務」

美聯物業高級分區營業經理鍾家豪透露,該行安排360相機拍攝單位,如部分業主不願開門睇樓,就會嘗試約業主為單位拍攝360影片,以作推廣。如果買家睇相睇片後仍有意承接,業主通常亦會肯開門睇樓。該行亦已添置潔手液、消毒用品、口罩等,以提供代理或無口罩的買家使用,方便入去業主單位睇樓。不少業主亦會主動查詢,睇樓客於最近14日內是否有到過內地,或要求睇樓客戴口罩方可入屋。

鍾家豪續指,新近錄得329呎的荃灣中心17座高層D室成交,原業主開價$435萬,最終以$433.8萬獲承接,呎價$13,185。買家為準新婚上車客,曾於去年12月到荃景圍睇樓;日前再到區內睇樓,發現價錢已比去年平超過一成,故今次睇樓後即時拍板入市。參考同屋苑過往成交,一個與是次成交同座但低一層的同室單位,於去年7月尾以$480萬易手,呎價$14,590;而屋苑同類單位18座低層D室,雖然較是次成交單位低22層,但於今年1月初亦以$457萬沽出,反映是次最新成交低於市價。

有車位業主連7人車放售

利嘉閣地產客戶董事李紋表示,奧運站一帶目前約睇樓困難,大部分單位都不予開放;亦有已落定單位,選擇撻訂。一個462呎的凱帆軒1座中高層E室,於去年11月開價$920萬放售,至今年1月已下調叫價至$878萬,終於2月初以$822.8萬沽出,呎價$17,810。惟市傳單位近日撻訂,業主將單位重新放售。

此外,沙田中心有車位業主出售屋苑停車場L1層單號車位,叫價$105萬;業主同時作價$15萬放售一輛7人車。若買家連車位及7人車一併購入,更可由$120萬減至$115萬。








港人港情品牌大獎2016-17